Faqe e parё|Lidhje|Komente

U përurua në Preshevë një vepër monumentale e Hevzi Nuhiut   Javën që shkoi, në Preshevë (Kosovë) u përurua një vepër e realizuar nga skulptori kosovar Hevzi Nuhiu, që ka shumë vjet që jeton dhe punon në Kalabri, Shën Mitër. Skulptori, edhe në këtë copë toke shqiptare ka dashur t’e përjetësonte figurën e Nënë Terezës, simbol i paqes, i dashurisë dhe i mirësisë, nëpërmjet një portreti të gdhendur në gur. Bëhet fjalë për një basoreliev (madhësi 180x95 cm) i realizuar mbi një shkëmb madhështor, të thirrur “Guri i Bazenit”, që e pret vizituesin në hyrjen e qytetit, i skalitur në thellësi deri në 7 centimetra dhe në një lartësi të shkëmbit prej pesë metrash. Zbulimin e veprës e bënë Dom Lush Gjergji, Kryetar i Shoqatës humanitare “Nënë Tereza”, dhe Nazmi Arifi, Kryetar i Kuvendit të Preshevës, në prani të gazetarëve dhe një publiku të madh. Gjatë fjalës përurimi Dom Lush Gjergji ka thënë se megjithëse shqiptarët ia kanë arritur bashkimit formal, ata duhet të bashkojnë mendjet dhe zemrat, dhe ka shprehur, në këtë rast, shpresën që puna e Nënë Terezës të jetë udhërrëfyes për popullin e Preshevës dhe për tërë botën. Ka ndërhyrë edhe piktori Demir Behluli, duke thënë se Hevziu ka përfaqësuar Nënë Terezën që me mirësinë e saj e ka zbutur dhe e ka ngrohur edhe një gur të fort dhe të ftohtë, duke ia dhënë jetën. Skulptori Hevzi Nuhiu, në një intervistë, ishte i lumtur për realizimin e ëndërrës së tij, sepse e ka sjellë figurën e Nënë Terëzës në vendin ku ka lindur. Ai ka treguar për muzeun e tij në hapësirë, Shën Mitër, që përmban pesëmbëdhjetë vepra, nga të cilat kemi Nënë Terezën e skalitur në një lis, dhe, me këtë vepër e fundit, ai e paralajmëroi pikësynimi t’e krijojë një muze hapësinor me figurat më të ndritura të historisë shqiptare, për të dhënë, nëpërmjet veprat artistike, një shtytje për një bashkim më të fort të popullit shqiptar.